General Santos City–Gipaabot nalang karon sa Traffic Management Unit ang mga kabanay sa namatay nga motorista nga nailang si Regar Numanap, 24 anyos nga nanimuyo, Purok 1, Barangay Apopong human nga nabangga ang gisakyan niini sa tricycle nga gimanihuan sa usa ka Jessie Torres, 51 anyos, nga nanimuyo sa Barangay Tinagacan ning syudad gabie miadtong nakalabayng adlaw sa Purok 13, National Highway, Barangay Tinagacan.
Sumala pa ni Police Staff Sergeant Mark Anthony Afante ang imbistigador sa maong kaso nga sa kasamtangan wala pa nagtagbo ang duha ka kampo aron hisgutan ang ilahang mamahimong settlement sa maong kaso nga gikamatay sa biktma ug gika angol sa mga backrider niini nga silang ronel taglay ug Nilo Villamor nga nagpabiling anaa pa sa hospital karong mga panahona.
Dugang pagbutyag niini nga nagpabilin pa karon sa balay tambalanan ang driver sa tricycle human nga makaangkon ug samad tungod sa maong panghitabo.
Gipakalaro usab ni PSSGT Afante nga ug dili maareglo ang duha ka mga panig posibleng mag atubang ug kasong reckless imprudence resulting to homicide, multiple physical injury ug damage of property sa nahisgutan.
Kung kahinumduman nga gikan sa Lagao padulong sa Davao ang dagan sa motorsiklo sa mga biktima sa dihang kalit lang milabang ang tricycle nga gimanihuan sa suspect nga naka-inom usab sa maong higayon padulong sa pikas lane hinungdan nga nagbangaanay ang duruha ka mga sakyanan nga miresulta sa kamatayon sa biktima. (Dave Silagan)
