Nanawagan karon ang duha ka mga kanhi sakop sa New People’s Army kinsa misulod pagka-sundalo ngadto sa ilang mga daan nga kauban nga mo-surrender na ug mobalik sa sabakan sa balaod.
Giangkon sa magsoong Calimhay kinsa gikan sa tribong higaunon nga ilang mga kauban sa walhong grupo ang mga bakwit gikan sa sitio Camanse, Barangay Banglay, Lagonglong, Misamis Oriental nga bag-ohay lang namalik sa ilang dapit.
Nanawagan usab si Rante Calimhay, 30 anyos ngadto sa iyang asawa nga si Inday Fe Pikumpas nga unta mobalik na sa ilang pinuy-anan tungod kay naghulat kanila ang ilang upat ka mga anak.
Saysay niini, lisod ang kinabuhi sa dihang wala pa kini mibalik sa sabakan sa gobyerno ug pirmi nalang silang gatago-tago sa kabukiran.
Misaad usab kining ihatag ang serbisyo sa gobyerno tungod kay ilang nakita uban sa iyang igsoon ang kaharuhay karong hingpit na silang nahimong sundalo.
