Davao City – Mireklamo sa presinto sa San Pedro PNP human nailad niadtong milabayng semana ang duha ka lalaki sa usa ka nagpakaron ingnon nga tag-iya sa usa ka tailoring sa Quimpo Boulevard ning dakbayan.
Ang mga nabiktima mao sila si Arnel Corrales, 33 anyos, nagpuyo sa PMPC Village Panacan ug usa ka Alvin Mamusog, 27 anyos, residente sa Brgy. Palma Gil Caraga, Davao Oriental.
Matud pa, ilang gireklamo kining suspek nga ginganlang Leo de Gusman nga maoy nakigtransak sa unang biktima nga si Corrales, nakahatag og kapin siyete mil nga cash isip down payment sa gipatahi nga 18 ka paresan nga uniform jersey samtang si 41 ka parisan ang gipatahi nga uniform jersey ni Mamusog ug mihatag sa tibuok bayad nga baynte dos mil ka pesos.
Dihang giadtoan sa duha ka biktima ang maong tailoring, nasuta nila nga wala na nagpakita ang suspek ug nagtuo nga nabiktima sila sa pagpangilad.
Walay nahimo ang duha ka biktima gawas lamang sa pagdangop sa presinto sa kapulisan aron nila paimbestigahan ug andam nga mopasaka og kaso batok sa suspetsado.
RadyoMan Don Pulayao
