Duha ka mga dagkong international event ang ipahigayon sa probinsya sa Sarangani karong bulan sa Septembre nga siguradong dugukan napud sa mga lokal og langyaw nga turista.
Kini mao ang Budayaw Festival og ang National Open Paragliding Accuracy Competition.
Mahitabo ang Budayaw Festival karong Septembre baynte (20) paingon Septembre baynte-kwatro (24) dinhi sa SOCSARGEN diin host ang dakbayan sa Heneral Santos, South Cotabato og Sarangani Province.
Pinakauna kini nga Budayaw Festival, nagpasabot nga festival of culture and the arts diin anaa sa tresentos (300) kabuok mga performer ang managtapok gikan sa upat ka mga nasud naila sa tawag nga BIMP EAGA kon Brunie-Indonesia-Malaysia-Philippines East Asean Growth Area.
Sa halos lima (5) ka adlaw nga aktibidad, makita, masaksihan og madunggan unya ang nagkadaiyang exhibit, workshop, cultural performance og uban pang educational activity musamot pag-ila sa atong gigikanan nga usa ra ka rehiyon sa Asya.
Sa Sarangani Province, gikatakda ang pagbisita sa mga international performers karong Septembre 22, madunggan ang native musical instrument, apil na ang pagkanta og pagsayaw, mapa-ambit ang mga pinasahi nga kultura.
Maong nag-awhag karon si Ms. LangLang Purisima, ang tourism officer sa Provincial Government sa Sarangani, nga adtuan kini sa mga taga-Sarangani. Sa mga nagpuyo sa Maasim, Kiamba og Maitum, atngan sa mga katawhan ang Maitum Gym isip venue. Sa mga taga-Glan, Malapatan og Alabel, adtuan ang Alabel Gym. Og sa Malungon, didto mismo ipahigayon ang presentasyon sa Kalon Barak Skyline Ridge.
Kung ang Budayaw Festival ang mahitabo September 22, gikahinaman pud sa mga hilig og adventure kining National Open Paragliding Accuracy Competition nga magsugod karon ng adlaw nga Sabado, September 2, sa Siguel sakop sa lungsod sa Maasim.
Matud ni Edilberto Banaag, ang organizer ilalum sa Soar High Sarangani paragliding club nga suportado sa Philippine Paragliding and Hang Gliding Association, anaa na sa napulo (10) ka mga paraglider nga foreigner ang nagpalista nga muapil, samtang kinse (15) usab ka mga Pinoy ang gikan sa laing parte sa nasud.
Nindot matud pa ang plastada sa paragliding site sa Sarangani maong gibansagan na kining paragliding capital sa Pilipinas.
