Malaybalay City, Bukidnon – Gibutyag sa Malaybalay City Fire Station nga epektibo ang Executive Order No. 28 nga gipirmahan ni Pangulong Rodrigo Duterte nga nag-regulate sa paggamit sa firecrackers ug ubang pang pyrotechnic devices sa pag-ubos sa ihap sa nabuthan sa pabuto ingon man ang insidente sa sunog atol sa pagsugat sa bag-ong tuig.
Sa interview sa RMN Malaybalay ngadto kang FO1 Paul Ronulo, information officer sa BFP-Malaybalay gibutyag niini nga kung ikumpara sa mga nakalabay nga tuig mas alerto ug aware karon ang publiko sa posibleng negatibong epekto sa pagpabuto.
Nagpasalamat usab si Ronulo sa Labaw nga Makagagahom tungod kay walay mga fire related incident ang natala sa siyudad atol sa pagsugat sa bag-ong tuig.
Bisan pa man niini, subling nagpahimangno ang BFP sa publiko nga magma-ampingon ug doblehon ang pag-amping aron dili mabiktima sa trahediya sa sunog.
Gidugang pa ni FO1 Ronulo nga bisan ug nahuman na ang pagsugat sa bag-ong tuig, apan pabilin silang naka-heightened alert tungod kay dili matag-an kung kanus-a mahitabo ang sunog.
Samtang sa text message nga gipadangat ni BFP 10 Regional Spokesperon Noli dela Rita, gibutyag niini nga duha ka sunog lamang ang natala sa ilang rehiyonal nga buhatan.
Walay sunog usab nga natala sa BFP Maramag ug sa BFP Valencia base sa mensahe nga gipdangat sa maong mga buhatan sa RMN.
