Batan, Aklan — Arestado ko gintingub nga pwersa it Provincial Intelligence Branch (PIB) CIDG, Aklan ag Batan PNP rong sangka eaeaki matapos nga ginserbehan it search warrant ro anang baeay sa Sitio Pandan, Bay-ang Batan, Aklan.
Rong suspek nakilaea kay Tito Legaspi, 46-anyos it nasambit nga lugar.
Narecover sa anang baeay rong sangka home made shotgun (pistolize), 2 ka bala it shotgun, sangka hand grenade ag sangka blue nga eco bag.
Ro nasambit nga search warrant hay ginpapanaog ni Executive Judge Bienvinido P. Barrios it RTC 6, Judicial Region,nga may petsang Hulyo 11, 2019.
Nasayuran nga nagpamalibad rong suspek nga magperma sa search warrant kamana man sa pakikipag angot it RMN DYKR Kalibo sa suspek hay ana man nga ginpamalibaran nga ana rong mga narekober nga armas kana.
Detained eon makaron sa Batan PNP rong suspek ag magapangatubang it kasong pagbayolar sa Sec. 28 it R.A. 10591 ukon Comprehensive Firearm and Ammunitions Regulations Act.
Samtang sa pihak nga parte kon matandaan nga rayang si Legaspi hay imaw man ra rong suspek nga nagbaril-patay kay Ludie Ramintas, 56-anyos it Bay-ang, Batan ko Marso 5, 2019.
Namatay si Ramintas matapos nga makaangkon it mga tama sa eawas tag raya hay barilon ko suspek.
Natabo rong insidente ko nagtaliwan nga Marso 5, 2019 sa suba nga sakop it Brgy. Pinamuk-an, New Washington, Aklan samtang nga sanda hay naga buoe it taeaba.
