Batan, Aklan — Nakaangkon it tama it pagbuno sa waea nga parte it likod ro sangka eaeaki matapos mabun-an kahapon it hapon sa Brgy. Camanci, Batan, Aklan.
Ro biktima nakilaea kay Frudencio Valentin Jr. y Gallardo, 57-anyos, samtang rong suspek nakilaea kay Jef Parohinog, 26-anyos, drug surrenderee tanan residente it nasambit nga lugar.
Suno kay SPO2 Jose Patron it Batan PNP, nga kahapon rayang biktima hay naga inuman kaibahan ro anang unga nga si Leonel ag Luther Gonzales Jr. samtang rong suspek hay sa pihak man nga lamesa sa baraka ni Gerose Mendoza.
Samtang naga inum-inum, rayang biktima hay hinambaean it suspek nga mag-uli eon ay kursunada ta ikaw, nag bais sanda hasta nga ko ulihi nagkasugot nga indi eon lang sanda mag inaway ay sangka daean malang sanda.
Umuli man rong suspek, samtang ro grupo it biktima hay nagsaylo it ilimnan. Maangan-angan bumalik rong suspek ag may daea nga pogakhang, gintutokan ag pinaeopkan sanda ugaling uwa mag eopok.
Gin-eogos ko grupo it biktima rong pogakhang sa suspek ag ko ulihi humambae raya nga lamano lang mana kita pero likom sa paghisayod it biktima may siyaw pat-a sa likod ro suspek, ana raya nga ginabot ag binuno rong biktima.
Samtang base mat-a sa panaysayon it biktima nga kahapon hay nagpanukot imaw it anang pautang nga karne ag anang nahasubeang rong suspek nga may daeang pogakhang ag imaw tinutukan pero anang nahaeogos.
Dayon imaw dumaeagan pero linagas imaw it siyaw ko suspek haabutan ang binuno.
Una nga gindaea sa Altavas Hospital rong biktima pero gin transfer daya sa Aklan Provincial Hospital para mataw-an it nagakaigo nga pagbueong.
Gin surrender man kay Camanci Punong Barangay Gener Malones ro baril ag siyaw ag gin turn over man sa mga pulis nga nag responde sa lugar.
Nagapabilin mat-a nga at-large rong suspek.
