Batan, Aklan – Kasong pagbayolar sa Sec. 28 it RA 10591 ukon Comprehensive Firearms and Ammunitions Regulation Act ro posibleng pagapangatubangon it sangka eaeaki matapos nga maaresto sa ginpatigayon nga raid it mga kapulisan kahapon it hapon sa Sitio Caeog-a, Brgy. Cabugao, Batan, Aklan.
Nakilaea rong suspek nga si John Rey Pamatian Magbiro, 29-anyos ag residente it nasambitan nga lugar.
Sa report it Batan PNP, ginreklamo it mga pumueoyo si Magbiro bangud sa pagpina-eupok it baril kada mahilong ag gina alegar pa gid nga gintutukan man nana it baril ro chief tanod it andang lugar ko nagtaliwan nga pyesta.
Nag-abot man sa punto nga imaw ra hay makapilang beses nga ginpatawag sa andang barangay ugaling hay uwa raya mag appear rason nga gin aplayan it search warrant.
Sa pag search it mga kapulisan, narekober sa aparador ko suspek ro Caliber38 ag ap- at ka mga bala.
Sa makaron hay una eon sa kostudiya it Batan PNP si Magbiro.
