Banga, Aklan – Dead on arrival sa hospital rong sangka eaeaki matapos nga sunggaban it nakamotorsiklo samtang raya hay sakay man it motorsiklo kabii sa national highway it Brgy. Jumarap, Banga, Aklan.
Rong biktima nakilae kay Jan Rey Castro ViVas, 20-anyos ag residente it Brgy. Jumarap sa nasambit nga banwa.
Sa pakikipag-angot it News Team kay Police Staff Sergeant Danilo Dalida Jr. it Banga PNP nga kabii natabo rong aksidente matapos nga sanday Rondin Rebanio angkas si Alvin Zabiaga hay sakay it Rouser nga motorsiklo ag Guilbert Boscano nga sakay man it anang Raide nga motorsiklo hay halin sa Linabuan Sur sa sangka kasadyan ag anda nga gin hatod rong nobya ni Guilbert sa Brgy. Tabayon.
Tag sanda eon nagapabalik it uman sa Linabuan Sur anda nga nahasubeang rayang biktima partikular sa kurbada nga parte it karsada sa prente it Shell Gasoline Station ag sinunggaban ko motorsiklo nga ginamaneho ni Rebanio ag hadaeahig pa gid ko motorsiklo nga ginasakyan ni Boscano matapos rayang si Rebanio ag Boscano hay nag karera.
Matapos nga matabo rong insidente hay insigida nga ginpangdaea ra sanda sa hospital pero rayang si Vivas hay gin deklara nga dead on arrival ko anang doktor bangud sa fatal nga lastro, si Zabiaga hay gin refer sa OPD samtang si Rebanio ag Boscano hay padayon mat-a nga ginabueong.
Nasayuran nga rayang mga persona hay uwa it helmet, uwa it lisensya ag uwa man it nagakaigong dokumento sa ginamanehong motorsiklo.
Sa makaron hay nagapadayon pa rong imbestigasyon it Banga PNP angot sa nasambit nga insidente.
