Dili solusyon ang Enhance Community Quarantine kon ECQ pagsumpo sa gikahadlokang Corona virus Disease o COVID-19.
Mao kini ang gibutyag ni Mayor Oscar Moreno, silbing tubag sa panawagan sa iyang mga kritiko nga ipa-ilawom na sa ECQ ang syudad sa Cagayan de Oro tungod sa nagkataas nga listahan sa nagpositibo sa Covid-19.
Lakip na si Misamis Oriental Governor Yevgeny Vincente Emano, nagpadala nag sulat ngadto sa Malakanyang kay iyang gipangayo ni President Duterte nga ipa-ilawom na sa ECQ ang Misamis Oriental ug Cagayan de Oro tungod sa tulo ka mga pasyenteng nag-positibo sa Covid-19 ning syudad nga naglakip sa pasyenteng taga Sityo Pinikitan, Barangay Camaman-an, Lumbia ug Barangay Carmen.
Apan matud ni Mayor Moreno nga bisan pag ipa-ilawom sa ECQ ang syudad dili pa gihapon kini tubag sa problema sa Covid-19.
Kay matud sa Mayor nga ang kooperasyon ra sa katawhan ang sulbad sa corona virus pinaagi sa pagsunod sa mga patakaran nga pagpuyo sa balay.
-o0o-
