Kalibo, Aklan – Naging matawhay sa kabilugan rong resulta it katatapos eamang nga midterm election sa probinsya it Aklan.
Raya rong ginkomperma ni Mr. Crispin Raymund “Dodoy” Gerardro, Information Officer it Comelec Aklan sa pakikipag-angot it RMN DYKR Kalibo sa programang Straight-to-the-Point.
Suno kana nga kung ro seguridad ro pagahambaean hay naging matawhay ag uwa it mga major incidents nga natabo mag-eowas eamang sa mga nagtuhaw nga uwa pagkaintindihanan pero naayos man eagi.
Parte mat-a machinery hay may una man nga mga minor problems rong nagtuhaw ag nasolusyonan man eagi, mag eowas sa natabo sa sangka presento sa banwa it Malinao nga nag corrupt do SD Card it sangka machine ag nataw-an raya it solusyon pagka aga pa bangud nga gindaea pa sa syudad it Iloilo para mabayluhan.
Sa pagtransmit mat-a it resulta ko election halin sa mga kabaranggayan hay na delay man it sangkiri paadto sa Provincial Board of Canvassers bangud sa problema sa signal.
Sa pihak nga parte, nagpadumdom mat-a si Gerardo sa mga nagdaea-og nga kandidato nga mag submitar it Statement of Contributions and Expenditures (SOCE) bangud nga rong indi maka submitar hay posible indi makapungko sa andang pwesto.
Ana man nga gin apresyar dong mga kandidato nga kusang nagpanghukas it andang mga tarpaulin ag kung may una pa suno kana nga uwa hihukas hay hukson eon para nga indi man raya maging magamo sa panan-awan.
