Davao City – Hugot nga gipatuman karon ang mandatory hand sanitation sa tanang mga motambong sa Sangguniang Panlungsod (SP) Committee Hearings ug Regular or Special sessions silbing preventive action taliwala sa pagkuyanap sa COVID-2019 ilawom sa giisyung Memorandum No. 12 ni Davao City Vice-Mayor Sebastian Duterte.
Subay sa naasoyng memo, tanang mga Chiefs of Staff sa SP gimanduan nga likayang magtambay sa Session Hall atol sa mga regular o special sessions lakip na kadtong tanang mga walay transaksyon sa legislative department.
Ang tanang mga maintenance personnel gikinahanglang mag-disinfect sa SP Session Hall ug mga Conference Rooms antes ug pagkahuman sa matag deliberasyon.
Dugang niiini, kadtong naglisod og ginhawa, gikalentura, gi-ubo ug uban pa kinsay adunay simptomas sa flu gi-awhag nga mag-pundo na lamang sa ilang tagsa-tagsa ka mga panimalay ug likayang mo-adto sa Session Hall.
Segun ni SP Committee on Health chairperson Councilor Joselle Villafuerte, gawas sa gipagulang guidelines ni Davao City Mayor Sara Duterte angayan nga muaksyon gayod ang SP human nga aduna nay natalang transmission didto sa National Capital Region.
RadyoMaN Aimee Guinita
