Ipasa na sa Constitutional Consultative Committee ngadto kang Presidente Rodrigo Duterte ang final draft sa bag-ong federal constitution unyang hapon.
Kini ang gibutyag ni Atty. Reuben R. Canoy, miyembro sa Constitutional Consultative Committee atol sa interview ni RadyoMaN Zaldy Ocon sa programang Straight to the Point-Kuskos Batikos karong buntag.
Matud ni Atty. Canoy nga dunay himoon nga formal ceremony unyang alas tres sa hapon didto sa Malakanyang alang sa maong katuyoan.
Gibutyag ni Atty. Canoy nga niadto pang nakalabayng semana gipirmahan sa tanang miyembro sa Constitutional Consultative Committee ang final draft.
Gipasabot usab ni Atty. Canoy nga ang maong draft ipasa usab ni Presidente Duterte ngadto sa kongreso alang sa himoong constituent assembly dayon itanyag sa katawhan pinaagi sa plebisito.
Giklaro usab niini nga ang sugyot nga bag-ong konstitusyon, wala nagtumong nga lugwayan ang termino ni Presidente Duterte.
