Davao City – Usa lang si Pastor Dominador Cabuenas sa daghang mga nanag-iya og sakyanan kinsa apektado sa pagsaka sa presyo sa produktong petrolyo gumikan sa Tax Reform for Acceleration and Inclusion kun TRAIN Law.
Segun ni Cabuenas, sa wala pa ang excise tax sa usa ka semana P400 lang ang iyang itubil sa krudo sa iyang sakyanan apan karon muabot na sa P600 kun dugang P200.
Usa lang si Cabuenas sa daghang mga Pilipinong niangal sa TRAIN Law tungod lakip nga nisaka mao ang presyo sa mga nag-unang palaliton nunot sa P7 nga excise tax sa petrolyo.
Gimahay og maayo ni Cabuenas ang TRAIN Law tungod misutoy ang presyo sa basic ug prime commodities karon sanglit dugang palas-unon kini sa yanong lungsuranon hilabi na sa kadtong gagmay ra og sweldo.
Aghat usab ni Cabuenas sa gobyerno karon nga rebyuhon ug tun-an pag-usab ang mao nga balaod ug kung mahimo dili na lang usa kini ipatuman h aron dili maglisod ang mga tawo.
Pikas bahin, nakibhangan ang ginansiya ni Henry Sarcina sa iyang bakery ug sa tindahan nunot sa TRAIN Law gumikankay pipila na lang ang mupalit og softdrinks ug uban pa tungod sa pagsaka sa presyo niini.
Kaniadto mapalit sa P15 ang family size apan karon P25 na kini nunot sa dugang buhis gipatong sa beverages ug sweetened products sama sa softdrinks ug packed juice ug uban pa.
Posible nga sunod buwan mapugos na si Henry sa pag-usbaw sa presyo sa iyang pan tungod sa pagmahal sa mga ingredients sa tindahan nga iyang ginapalitan.
Gitin-aw sa negosyante nga dili siya supak sa TRAIN Law apan ang problema dili pareho ang Pilipinas sa ubang nasud nga madapat sa tawo ang dakong buhis pinaagi sa mga programa ug mga serbisyo.
Sumala ni kanhi Davao City Chamber of Commerce and Industry President Tony Dela Cruz nga natural lang dunay usbaw sa presyo sa basic ug prime commodities kay duna ma’y pagsaka sa buluhisan sa pipila ka produkto.
Nagtoo si Dela Cruz nga gitun-an kini sa mga economic managers ni Pres. Rodrigo Duterte sa tuyo nga maponduhan ang mga proyekto sa gobyerno karon nga ‘Build, Build, Build.’
RadyoMaN Joel Viray
