General Santos City—malampusong narekober sa kapulisan ang motorsiklong gipanag-iyahan sa usa ka mananagat nga si Christoper Barcoma, 26, residenti sa Barangay Colon, Maasim, Sarangani province kansa una nang gikawat sa wala mailhing suspek samtang kini nakaparking lang sa gawas sa usa ka diskohan sa may Barangay Bales, Maasim Sarangani Province.
Nasayran nga igo rang nag lingaw-lingaw ang biktima sa gihimong kalingawan sa lugar kung asa iyang motorsiklo iyang gibilin gawas sa diskohan apan pag gawas niini aron unta mupauli, wagtang na ang iyang motorsiklo mao nga siya mireport sa kapulisan.
Gilayon man nga nagpahigayon ug hot pursuit operation ang Maasim PNP ug nakit-an ang motorsiklo niini nga usa ka Honda Wave kolor itom nga giabandona sa sagbutan nga bahin sa Tinoto, Maasim.
Sa karon nagpadayon ang gihimong imbistigasyon sa kapulisan kalabutan sa insidenti.
