BACOLOD CITY – Ginrelease na sa detention ang driver sang SUV nga nakabunggo sa isa ka traysikol kahapon sang kaagahon sa Brgy. Villamonte nga nagtuga sang kamatayon sang tatlo ka biktima kag pagkasamad sang 4 ka iban.
Base sa record sang Police Station 4, ginrelease si Luigi Malacon, 28 anyos kag pumuluyo sang Barangay 2, EB Magalona matapos nga nag-lapse na ang 18 hours nga reglementary period.
Suno sa Police Station 4 gintinguhaan sang traffic investigator on case kag sang mga himata sang biktima nga maka-kuha sang gina require nga mga dokumento kaangay sang death certificate kag autopsy report agud kuntani ma file ang kaso.
Apang napaslawan ini nga mahatag sang mga concerned nga talatapan nga ila ginpangayuan sa rason nga indi available ang doctor para sa post mortem.
Madumduman nga pasado la una kahapon sang kaagahon sa B.S Aquino Drive, Brgy. Villamonte, malapit sq Barangay Hall nabungguan sang salakyan ni Malacon ang traysikol sang mga biktima rason nga nagkalamatay sanday Erlinda Villar, 60 anyos kag ang iya duha ka mga kabataan nga sanday Melinda Tesoro, 44 anyos ang edad kag Rudelyn Nasis, 31 anyos ang edad, tanan pumuluyo sang banwa sang Murcia.
Nasamaran naman ang driver sang traysikol nga si Elvis Barcenas, 33 anyos ang edad, Erica Tesoro, 16 anyos, Genalyn Villar, 19 anyos kag Merlinda Barcenas, 57 anyos ang edad, tanan tumandok sang Murcia.
Angut sini, nakabaton na sang initial assistance ang pamilya sang mga nabiktima halin kay Malacon pinaagi sa iya abogado nga si Atty. Depasucat, samtang ang mga nasamaran naman nga biktima ang ginsaylo na sa Riverside Medical Center base man sa request sang mga himata./dyHB BACOLOD
