SAN ENRIQUE – (2nd Update) Luwas na sa katalagman ang isa ka 21-anyos nga babayi nga nagbuko maghikog pinaagi sa pagbuno sang iya kaugalingon kahapon sang kagahon sa isa ka barangay sa banwa sang San Enrique.
Suno sa imbestigasyon sang San Enrique Police Station ang biktima kag ang iya live-in partner ang nag-away tubtub nga naglab-ot sa pagpang-yawyaw sang babayi.
Ginpahayag nga na-iritar ang lalaki sa tuman ka gahud nga baba sang babayi nga nagatuga naman sang istorbo sa ila mga kaingud.
Bangud sini, gintabunan sang lalaki ang bibig sang iya live-in partner apang imbes nga mag-kalma, ang ginhimo sang biktima amo ang pagkuha sang kutsilyo kag ginbuno niya sini ang iya tiyan.
Nag-angkon sang pilas sa iya tiyan ang biktima matapos nga siya mismo ang nagbuno sini.
Dali-dali nga gindala sa Valladolid District Hospital ang biktima apang sang ulihi ini ang ginsaylo sa isa ka ospital diri sa Bacolod kon diin padayon ini karon nga ginabulong./dyHB BACOLOD
