Kalibo, Aklan – Nagpatigayon kahapon it State of the Province Address (SOPA) si Gov. Florencio T. Miraflores sa Sangguniang Panlalawigan Session Hall kung sa siin anan kara nga ginhathat ro mga accomplishments ag awards kung probinsya kamana man ro mga plano pa gid.
Una na karang ginplastar rong mga awards nga nabaton it sari-saring departamento ag ahensya it gobyerno probinsyal.
Ro Sangguniang Panlalawigan na naging excellent sa Local Legislation, pagiging grand slam it gobyerno probinsyal sa Seal of Good Local Governance (SGLG) Award kung sa siin nahabuoe raya sa tatlong sunod-sunod nga dinag-on nga ginatao it Department of Interior and Local Government (DILG).
Nagapatimaan eamang raya sun okay Gov. Miraflores nga rong pag ginobyerno it aton nga mga public official it probinsya hay mayad.
Naging grand winner man ro Public Employment Service Office (PESO) sa pagpamuno ni Ms. Vivian R. Solano nga maging Best PESO sa bilog nga nasyon ag naging regional winner sa special employment program ko mga estudyante.
Gin mensyonar man Gov. Miraflores sa anang SOPA nga rong Provincial Assessors Office hay naging outstanding man kung parte sa mga real property tax rong pagahambaean kamana man ro assessment value it mga real properties hay sambilog sa mga ginta-aw nga naging rason nga nabuoe rong award.
Sa ikaywang parte it anang SOPA hay ro parte sa mga on-going projects ag construction projects nga ginapundohan ag gin usuyan it pundo ko aton nga gobyerno probinsyal.
Sambilog eon kara rong on-going nga construction it building sa prente it legislative building kung sa siin naghalin rong pundo kay dati anay nga Senador ag makaron Antique Congressman nga si Loren Legarda nga nagabalor it P 50 milyon pesos. On-going man rong construction it Assessors building nga nagabalor it P 8 milyon.
Plano pa gid rong on-going nga pagpanami it Godofredo P. Ramos Park nga sambilog man sa mga handum it gobyerno probinsyal it Aklan nga maging manami nga pamasyaran it atong mga pumueoyo nga sa video presentation hay makita nga may unang dancing fountain. Mageowas karon hay magabutang man it straktura nga mga baealigyaan it pagkaon para nga ro mga maga adto turista man ukon bukon hay may sarang nga mabakean it pagkaon samtang nagapueopamasyar sa Goding Ramos Park.
Ro rehabilitasyon it ag improvement it Malinao-Madalag road nga nagabalor it P 147,000.000 sa Phase 1 ag P 46.4 milyon sa Phase 2.
Samtang sa katung-anan ko anang SOPA hay gintalakay rong parte sa Health Services. Gin hambae na nga kung kato hay problema rong bueong ko mga nagapabueong sa Provincial Hospital makaron suno kana hay amat-amat eon nga ginasabat rong kakueangan it provincial government paagi sa consignment system.
Sa consignment system hay magabutang it mga bueong ro mga kompanya sa Provincial Hospital tapos kon pila eamang ro nahabakae hay rato man ro pagabayaran it provincial government tapos ro mga uwa magamit hay pwede bue-on it mga kompnya ag bayluhan eoman it bag-o ag dikara nga pamaagi hay nabuhin-buhinan rong problema sa kakueangan it bueong partikular rong sa idaeom it Economic Enterprise Development Department ukon EEDD kung probinsya it Aklan.
Dugang pa gid nga rong probinsya it Aklan rong kauna-unang probinsya nga napili nga una mang maga implementar it Universal Health Care Act nga kon ma implementar daya hay uwa eon it maski sintimos nga pagabayaran ro mga pobreng pasyente nga magapa confined sa provincial hospital.
Naha mensyonar man ni Gov. Miraflores ro parte sa isla it Boracay nga suno kana hay ama-amat nga ginapatigayon rong rehabilitasyon sa karsada ag drainage sytem matapos nga raya hay ipasarado para nga maging sikat pa gid nga tourist destination sa bilog nga kalibutan.
Sa ulihi ginpasaeamatan man ni Gov. Miraflores rong tanan nga mga naging instrument ag nagtao it suporta sa anang administrasyon para nga maabot rong handum para sa probinsya it Aklan.
#TatakRMN <www.facebook.com/hashtag/tatakrmn?source=feed_text&epa=HASHTAG&__xts__%5B0%5D=68.ARBs-NhbR649U6UTx4WHhYQqslZUCnQ2hxwx3eZfLoxt-tKydicgLb3SDOqjpCKWp6lITm-WOdMWekU-RPhnmV_IPB4tqFbCQBMHGCLyIfer_yXSLXbT…>
