Libacao, Aklan – Nagreklamo sa Libacao PNP rong sangka 15-anyos nga dalagita matapos nga ginhimuslan it tatlo ka mga minor de edad man nga mga binatilyo sa sangka barangay sa banwa it Libacao.
Rong tagreklamo hay sangka Grade 11 ag ro mga gina reklamo hay ana man nga kaklase ag schoolmate.
Suno kay Police Captain Jose Marlon Morallo, rong Chief of Police it Libacao MPS nga natabo rong insidente ko September 14 it gabii ag nagreport sa andang opisina ro biktima ko Okrubre 9, 2019.
Nabuhayan bago maka report rong biktima bangud nga nahadlok imaw sa anang tatay pero ko ulihi nabalahuba raya ag nag eapta ro balita sa andang eskwelahan.
Dikara imaw gin usisa ko anang maestra kon ano kamatuod ro haka-haka ag ko ulihi nag-ako ro biktima.
Ginpasayod rayon it anang maestra ro nanay it biktima ag nag report sanda sa Libacao MPS.
Sa pag-usisa it mga kapulisan nasayuran nga ko September 14, Sabado it gabii hay may bayle sa andang barangay bangud nga nagahilapit rong andang kapyestahan ag nag-adto ro biktima.
Tag tapos eon ro binayle, gina usoy it bikitma ro anang manghod ag naha agi imaw sa baeay ko andang maestra kon sa siin idto ro anang magueang nga eaki naga inuman.
Ginsampit imaw ag gintagayan. Tag naka pilang tagay eon imaw hay nag-eaong raya nga mauna ay bangud nga medyo tinamaan imaw ko anang ininum.
Naga paguwa imaw sa gate ko baeay it anang maestra tag umagi ro tatlo ka mga suspek. Naghambae ro sambilog sa tatlo nga ibhan sanda para sueangon man ro anang girlfriend.
Kumo kilaea sanda it biktima, kaklase ag ka apelido pa nana ro sambilog hay nagsunod imaw. Samtang naga panikangon sanda hay naghambae eoman ro nagsampit ngato nga indi eon lang sanda magpadayon ag idto eon lang anay sanda sa may eangbon (payag) ag ko ulihi nag inum-inum sanda nga ap-at.
Base sa affidavit it biktima, nga samtang sanda naga inum-inum nag eaong imaw nga mahuway huway sa medyo kwarto ko payag nga kurtina malang rong naga tabon bangud nga maeain eon ro anang pamatyag sa andang ininum.
Samtang idto imaw sa sueod hay maangan-angan nag apas ro sambilog sa mga suspek, ginhuliran imaw ag ginpangbuytan ro mga maselan nga parte it anang eawas ag natigayon ro pagimueos, sumunod man dayon ro sambilog ag ro pangatlo hay uwa eon nana mapan –uhi bangud nga amat-amat eon imaw nga nadueaan it alintro ag nahakatueogan.
Ro daywa sa mga suspek hay naga pang edaron it 17-anyos ag ro sambilog hay 16-anyos.
Nahaabutan imaw ko anang magueang nga eaki sa payag ag ginpukaw rayon ag gin alalayan pauli sa anda.
Sa makaron hay nagapadyon pa ron imbestigasyon it mga kapulisan.
Gin paidaeom sa medical examination ro biktim ag iga pa-assist pa sa DSWD rong kaso para ma determina kon may discernment ag kung mai-file raya hay pinaagi sa regular filing.
Samtang nagpadumdom man si Police Captain Morallo sa mga ginikanan nga sanda mismo rong una nga magsaway sa andang mga unga kon makita nga naga inum kapin pa sa mga babaye. I-check suno kana kon siin ro andang mga unga ag kon nano ro aktibidad ko andang mga unga para nga magiyahan sa husto.
#TatakRMN <www.facebook.com/hashtag/tatakrmn?source=feed_text&epa=HASHTAG&__xts__%5B0%5D=68.ARCS-F0YPC40OE7HxvTO7j4iaoM4vGFlDRshRbEv-Y6_btsHNVFhHMyv8_TobXHBwUAKgjqEnVJMTUaH59W8OQi-hJIPKTxeMZo433__XavqjMivQ2fh…>
