Gumikan sa selos, menor de edad gidunggab, patay

26
Patay na nga gidala sa balay-tambalanan ang usa ka menor de edad nga gidunggab sa karibal niini sa babae gumikan sa selos takna alas 11:30 sa buntag kagahapon didto sa Purok-11, Sitio Mabuhay, Barangay San Jose, Malaybalay City, Bukidnon.

Giila ang suspetsado nga si Willy Tinunhay, 42 anyos, ulitawo, tapasero, ug residente sa Purok-8, Laligan, Valencia City.

Sumala sa taho sa kapulisan, nga pasado alas 11 kagahapon sa buntag gidunggab ni Tinunhay ang menor de edad nga biktima ang kinsa mipalit og shampoo sa tindahan. Didto nanaglalis ang duruha nga miresulta sa pagpanunggab sa ubos nga bahin sa tuo nga dughan sa biktima. Misuway pa og pangayug tabang ang biktima sa usa ka habal-habal drayber nga maoy midala kaniya sa Bukidnon Provincial Medical Center (BPMC) apan gideklara nang dead-on-arrival sa attending physician.

Samtang, paghuman sa maong insidente, boluntaryong misurrender ngadto sa Purok President ug sa Barangay Public Safety Officer (BPSO) sa naasoy nga barangay si Tinunhay nga kasamtangang anaa na sa kustodiya sa Malaybalay City Police Station samtang ginaandam ang kaso batok kaniya.

Facebook Comments