KALIBO, AKLAN — Dakop rong sangka gwardya sa ginpatigayon nga buy-bust operation kabii sa isla it Boracay.
Nakilaea rong nasambit nga gwardya kay Alex Garcera, 33-anyos, native it Tapaz, Capiz, detachment commander it security agency ag temporaryo nga naga istar sa Brgy. Yapak.
Nadakpan si Garcera matapos nga mabakean it sangka plasti sachet it ginapatihan shabu kabaylo it 1,000 pesos nga buy-bust money is sangka poseur buyer.
Samtang sa ginpatigayon nga body search kay Garcera nabuoe pa gid kana ro 13 ka mga sachet it ginapatihan shabu ag sangka 9mm nga baril.
Si Garcera hay ginakabig nga newly identified drug personality it mga kapulisan.
Ro nasambit nga operation hay ginpatigayon ko mga meyembro it Provincial Drug Enforcement Unit (PDEU), Philippine Drug Enforcement Agency (PDEA), Provincial Intelligence Branch (PIB) BTAC ag Malay MPS.
Magapangatubang it kasong pagbayolar sa RA 9165 rong suspek.
