Davao City – Andam nga mupasaka og kaso ang kabanay sa biktima sa nahitabong bangga sa Brgy. Astorga, Sta. Cruz, Davao del Sur kagahapong adlawa, Marso 6, 2019, alas-11:50 sa buntag nga gikalambigitan sa usa ka tricycle, bonggo ug wing van.
Sa pakighinabi sa DXDC RMN Davao kang Juventino Enriquez, kagawad sa Brgy. Astorga, Sta. Cruz ug igsoon sa biktima nga si Crispin Enriquez, 49-anyos nga maoy driver sa tricycle, gibutyag niini nga mo-file gayud siya og kaso human nga misutoy lang ang bonggo nga nakabangga sa gimanehong sakyanan sa iyang igsoon.
“Mo-file gyud ko og kaso, hit and run gud ni. Criminal case ning gibuhat nila. Kadtong nakabangga, mo-surrender na lang sya. Kung dili sya mo-surrender, mas dako ang iyang kaso nga i-file nako sa ilaha,” segun niini.
Saysay niini nga gipadaplin sa iyang igsoon sa karsada ang tricycle niini apan kalit na lamang nga mibangga ang naghaguros nga pula nga bongo sa likod sa tricycle rason nga midasok kini sa naka parking nga wing van.
Dugang pa sa igsoon sa biktima nga naka angkon og bali sa kalawasan ang iyang igsoon nga gilayong gidala sa ospital samtang pangus lamang ang naangkon sa usa sa tulo ka mga sakay sa maong tricycle.
Sa pakighinabi usab sa DXDC RMN Davao kang PO3 Javar Borajan, Traffic Investigator sa Sta. Cruz PNP, gisaysay niini nga makonsiderang hit and run ang insidente human nga misutoy lang bonggo nga sakyanan human sa panghitabo.
RadyoMaN Kirby Manzon
