Mabaskog nga gina patuman ko Local Government Unit (LGU) Kalibo ro implementasyon it “Oplan Hawan” sa pangunahon nga mga karsadahon sa raya nga banwa.
Pila ka mga maintok nga mga baligyaan sa mga sidewalk do mga ging pahalin ko “Task Force Hawan”kung sa siin ging pang-guba ro andang mga baligyaan kaibahan eon do mga pagpahalin ko mga saeakyan nga naga parking sa gina bawae nga lugar.
Kaangot kara ging kaugot man it pila ka mga manugbaligya ro tikang it LGU Kalibo bangod nga naduean suno sanda it andang pangabuhian.
Pero sa ulihe uwa man it nahimo do mga ging suway kundi sundon do Municipal Ordinance 2005-043 ukon ro traffic code it banwang Kalibo.
Ro rayang tikang hay para masolusyonan do problema it naga ginutok nga karsada iya sa banwa it Kalibo nga naga tuga man it grabe nga trapik eabi eon gid kung rush-hour.
