Liwat karon napamatud-an nga ang kapigaduhon indi sablag sa pag-angkon sang kadalag-an agud malab-ot ang handum para sa masanag nga palaabuton.
Sa pinaka-una nga kahigayunan sa maragtas sang probinsya sang Negros Occidental, may isa ka Indigenous Peoples (IP) nga scholar nga naka-pasar sa Japanese Language Proficiency Test (JLPT) Level 3 ukon N3 sa Miyazaki Prefecture, Japan.
Ini siya amo si Darlyn Rebatado Blancia, halin sa Brgy. Kumaliskis, Don Salvador Benedicto, recipient sang Negros Occidental Scholarship Program sa idalum sang Assistance to Grade 10 nga mga estudyante sa Miyakonojo Higashi High School, Japan nga kategorya.
Si Darlyn ang kamanghuran sa 5 ka mag-ulutod, 15 anyos lang siya sang ini ang nag-apply para sa scholarship sa Japan sadtong 2018 kag isahanon nga ginpadaku sang iya iloy nga si Merlinda Blancia upod ang iya mga utod bangud ini sila ang gin-abandonar sang ila amay masobra isa ka dekada na ang nakaligad.
Ang iloy ni Darlyn naga-trabaho bilang house helper agud masuportahan sila nga mag-utod sa diin ini sila ang naga-istar gid lamang sa hayub-hayub, gamay nga balay nga kon adlaw ginahimo nila kusina kag kwarto naman kon gab-i.
Sang napilian si Darlyn bilang isa sa mga scholars para sa Japan, ini siya ang napuno sang pag-asa sa pagpati nga mahatagan niya sang maayo nga pagpangabuhi ang iya iloy kag mga utod.
Sini nga February 20, 2021, maga graduate si Darlyn sa Miyakonojo Higashi High School kag magapadayon sang iya pagtuon sa Houshin School of Healthcare sa sulod sang duha ka tuig.
Ini siya ang 18 anyos na sa karon kag mahimo siya nga makatrabaho, part time samtang nga naga-eskwela agud nga masuportahan ang iya kaugalingon sa Japan.
[image: image.png]
