Nagtuga sang kakugmat sa mga nagalabay nga tawo sa Iloilo Freedom grandstand ang isa ka itom nga back pack nga ginbilin sang wala makilala nga tawo kaina sang hapon.
Ini matapos ginkabalak-an nga naga-unod sang explosibo ukon bomba ang nasambit nga bag.
Bangud sini, ginsecure sang mga pulis ang area kon sa diin, temporaryo nga ginbarikadahan sang ICER ang freedom Grandstand agud indi makasulod ang mga salakyan kag masiguro ang safety sang publiko.
Subongman, samtang nagakaran-karan ang mga pulis, isa ka lalaki ang nag-abot kag ginkuha ang amo nga bag nga natukiban mga bayo sini ang unod.
Sang gin-usisa ang nasambit nga lalaki, nagpakilala ini nga si alyas JAY-R nga taga-Bicol kag nagkadto diri sa Iloilo agud mangita sang trabaho.
Suno kay Jay-R nga ginbilin niya sa kilid sang poste sang Freedom Grandstand ang iya bag bangud nagasalig siya nga indi ini madula.
