TACLOBAN CITY – Tulo na kabulan an nakalabay matapos an misencounter han mga kasundaluhan ngan kapulisan ha Brgy. San Roque, Sta. Rita,Samar kun diin nagbilin hin unom (6) nga patay ngan siyam (9) nga samaran ha hanay han PNP.
Para kan Graciel Escalo nga namatayan hin asawa, diri pa niya mapapasaylo an mga kasundaluhan nga pumatay han iya asawa durante han misencounter.
“Madugay it healing process, I don’t know kun kuan [hul-os] ha akon heart ba… madali la it pagyakan nga mapapasaylo but deep inside makuri pa hiya pero maabot gihap it panahon nga mapapasaylo pero yana it healing proccess madugay talaga.”
Dugang ha pamahayag ni Escalo, masakit pa iton iya gin-aabat ha pagka-yana ha pagkawara han iya asawa nga hi PO1. Julie Escalo.
Nakakarawat na gihapon hira hin financial assistance pero sumala ha iya diri matutumbasan hin kwarta an pagkamatay han iya asawa.
Nagpatapod daw gihapon an PNP ngan AFP nga aasikasuhon an iba pa nga financial assistance pati na nagpapadayon nga imbistigasyon.
“Magkaka-uruistorya pa man ngan magpapafollow-up pa man. Nasiring man an commander nga after pira kamonths magkikirigta pa kami.”
Karuyag gihapon maka-istorya han mga pamilya nga namatayan an mga kasundaluhan nga naka-engkwentro han ira mahal ha kinabuhi.
