Gikumpirmar ni Kapitan Wendilyn Escobia sa Barangay Cugman ang kagubot nga nahitabo atol sa sesyon niadtong Hulyo 15 ning tuiga sa iyang barangay.
Matud ni Kapitan Escobia, nga kini si Kagawad Elmer Cotiamco adunay propenesyon, nga kung kinsa ang mga kagawad nga dili mouban kaniya, iya kining idamay ug iapil sa kaso.
Dugang pa ni Escobia nga tagsa-tagsa nga gibirahan ni Cotiamco ang mga kagawad naidtong higayona, gani unang gibirahan niini mao si Kagawad Randy Esclamado nga mao ang Chairman sa komitiba sa Appropriation.
Apan tungod kay gisuklan kini ni Kag. Esclamado, hinungdan nga didto na usab kini namira kang Kag. Mario Diaz.
Nasayran nga nahitabo ang tanan dihang mo-report unta ang tanang Kagawad nga naghawid og mga komitiba alang sa kalamboan sa ilang gipanghawiran.
Samtang personal ang away nilang Kagawad Mario Diaz ug Kagawad Elmer Cotiamco.
Apan niadtong panahon sa sesyon, ang tuno sa tingog ug ang unod sa istorya ni Kag. Cotiamco maoy nakapatandog ni Kagawad Diaz.
Nasayran nga niabot pa sa punto nga nahisgutan na ang pag-adto ni Kag. Cotiamco sa balay ni Kagawad Diaz aron kini dauton sa asawa.
Matud ni Kapitan Wendilyn Escobia nga sa iyang tan-aw, tungod kay si Kag. Diaz usa ka Person with Dissability- hinungdan nga sa pagtindog niini natukod ang iyang kamot ngadto kang Kagawad Cotiamco particular sa liog, nga nagresulta sa pagsumbag ni Kag. Cotiamco kang Kag. Diaz, ug ang pagbalos usab pagsumbag ni Kag. Diaz ngadto kang Kag. Cotiamco.
Isip amahan sa barangay, nanghinaut si Kapitan Escobia nga unsa man ang kasilo sa duha ka Kagawad sa matag usa, nanghinaot kini nga mohupay ug moabot ang panahon nga magtinabanga sa trabaho.
Sa karon panawagan ni Kapitan Escobia ngadto kang Kag. Cotiamco, nga ayha na siya dauton niini kung moabot na usab ang eleksiyon tungod kay karon kinahanglan nga sila magkahiusa alang sa katawhan.
