New Washington – Uwa it foul play sa kamatayon ni Jeffrey Arelon, 40-anyos, bantay it tangke ag residente it District 3, Brgy. Pinamuk-an, New Washington, Aklan.
Raya rong ginpahayag ni Dr. Joe Martin Fuentes, Medico Legal Officer it Police Regional Office 6 matapos nga ginpaidaeom sa autopsy rong bangkay ni Arcelon kaina it agahon.
Suno kay Fuentes nga pagka eomos eamang ro ginkamatay na kara, nakitaan it tubi sa baga, may hematoma sa right portion it ueo ag pag pang itom it kuko patimaan nga nadueaan raya it oxygen.
Ro anang lastro sa ueo hay indi man nana ikamatay kon uwa imaw nahueog sa tubi ag nakabutwa.
Natuman eamang ro desisyon nga pagpa autopsy ko pamilya it biktima matapos nga rong biktima hay naga pinadamgo ag pati man sa anang igmanghod sa Manila hasta nga raya hay nag uli ag imaw ro nagdesisyon.
Matandaan nga nakita eon lang nga uwa it kabuhi si Jeffrey ko Huwebes it aga-aga sa sangka tangke kaibahan ro anang motorsiklo nga nahueog.
Suno kay Punong Barangay Bonifacio nga ko gabii bago rong insidente hay nag inum-inum pa raya kaibahan ro sambilog pang bantay sa tangke nga si certain “Biboy” tag nag-abot ro asawa it biktima ag gina pauli raya ay may trabaho pagka aga ag ko ulihi hay pilit nga ginbuoe ko asawa it biktima ro susi it motor ag umuli.
Naaywan ro biktima sa lugar, apang ko ulihi hay uwa man eon raya mapan-uhi ko anang kibahan nga pumanaw dahil uwa man it may nag-andar nga motor.
Ginapatihan nanda nga basi ginguyod it biktima ro motor ag sa unahan ginpaandar ag bangud sa tuman nga kahilungon hay nahueog raya kibahan ro motor ag uwa eon makabaeotbot.
Nakitaan it lastro sa dahi ro biktima pero ginapatihan raya ko mga residente nga tumama sa semento dahil may kongkreto nga parte sa lugar nga nahueogan it biktima.
