Kalibo, Aklan — Naka heightened alert makaron rong mga kapulisan sa probinsya it Aklan matapos rong pag pangbomba sa Jolo, Sulu ko nagtaliwan nga Enero 27, 2019.
Suno kay PO2 Ma. Jane Vega, PPIO PNCO nga base sa direktiba ni PCSupt. John Bulalacao, Regional Director it Police Regional Office 6 nga magpatigayon it mga security measures ag inisyatibo para nga mapamaeabagan ro ano mang mga plano it kaeainan partikular sa mga matawo nga lugar.
Sa makaron suno kay PO2 Vega, hay nag deploy it dugang nga mga pulis sa mga matawo nga lugar kapareho kung mall, plaza, simbahan ag tindahan kamana man nagapatigayon it information dissemination.
Maga dugang man it oras rong 1st Provincial Mobile Company para maglibot ag magmonitor man sa mga matawo nga lugar.
Nagpatigayon man sanda it close coordination sa Armed Forces of the Philippines (AFP) mga stakeholders ag force multipliers para nga mapapag on rong siguridad sa probinsya it Aklan.
Istrikto man nga iga implementar rong checkpoint sa mga boarder control ag iba pang lugar mag eowas sa gina implementar nga Comelec checkpoint.
Samtang sa pihak nga parte, kon siguridad sa isla man it Boracay ro pagahambaean hay uwa man it igkabaeaka suno kay PO2 Vega rong mga pumueoyo bangud nga nauna eong nakaplastar rong siguridad idto.
Naga hinyo man si PO2 Vega nga maging vigelante ag dapat may koordinasyon ag partisipasyon sa mga otoridad para sa siguridad it probinsya.
Sa makaron hay uwa man it namonitor ro mga kapulisan nga banta para sa siguridad it Aklan.
