Isa ka lalaki ang wala naglaum nga magatupa ini sa ospital sa adlaw sang bag-ong tuig matapos nga ini siya ang gina-allege ginbuno sang iya man lang mismo ugangan las 12:30 kaina sang udto sa Brgy. Alijis, Bacolod City.
Suno sa blotter sang Police Station 7, ang biktima ginkilala kay Roberto Espartero, 35 anyos samtang nakilala naman ang suspek nga si Amelita Bacong, 57 anyos, balo, lunsay pumuluyo sang Purok Villa Baradas, Brgy. Alijis, ciudad sang Bacolod.
Nakabutang sa blotter sang PS7 nga samtang ang biktima nagapreparar agud nga magluto sa ila balay, hinali na lamang ini nga ginbuno sang iya ugangan gamit ang kutsilyo.
Naigo sa iya tiyan ang biktima kag gindala ini sa South Hospital sa diin ang suspek naman natigayon nga maaresto, samtang padayon ang imbestigasyon sa motibo sang krimen.
