South Cotabato — Nagpadayon pa karon ang gihimong imbistigasyon sa kapulisan kalabutan sa pagpamusil ug pagpangilog ug motorsiklo sa wala pa mailhing mga suspetsado sa usa ka lalaki sa may Sitio Basak, Barangay Polonuling, Tupi.
Giila ang biktima nga si Ronilo Fuentes Fullona, 36, minyo ug residente sa Purok 5, Barangay Kauran, Ampatuan, Maguindanao.
Subay sa report sa Tupi pnp nasayran igo lang nagsilong ang biktima sa may fruit stand nga nahimutang sa kilid sa kalsada sa national highway gumikan kusog ang ulan.
Kalit lang matud pang mibutho ang duha ka lalaking nakamotorsiklo. Usa sa mga suspek ang kalit gisakyan ang motor sa biktima mao nga gipugngan kini sa nasampit apan nibun lot ug pusil ang suspetsado dayon gipusil ang biktima gamit ang wala pa matinong matang sa armas.
Nakaangkon ug samad ang biktima sa iyang tiyan kansa daling gidala sa ospital samtang suspek misibat gilayon dala ang motorsiklo sa biktima.
Sa karon gipaningkamutan pa sa PNP nga nmailhan ang duha ka mga suspetsadong responsabli sa krimen.
