Lalaki nga gin abduct kahapon nasapwan patay kaina sang kaagahon

28

Nasapwan na gid lamang nga patay na pasado las 3 kaina sang kaagahon sa area sang East Homes 6 sa Brgy. Mansilingan, Bacolod City ang isa ka alleged drug personality nga ginreport gin-abduct mga las 5 kahapon sang hapon sa Brgy. 3 ciudad sang Bacolod.

Ang bangkay ni Richard Tutop, 33 anyos, residente sang Purok Cereza South, Brgy. 3, Bacolod City ang nasapwan nga may igo sa iya ulo kag ini ang gin-kilala mismo sang iya amay nga si Niro Tutop.


Madumduman nga kahapon ginreport nga si Tutop ang gin-kuha sang tatlo ka armado nga mga lalaki sakay sa color gray nga pick-up samtang nga ini ang nagapungko sa isa ka traysikol.

Nahibaluan nga si Tutop ang bag-o lang nakagwa sa prisohan bangud man sang kaso sa illegal drugs.

Angut sini, ginpahayag ni Nero Tutop, amay ni Richard nga madugay na niya nga ginahambalan ang iya bata nga untatan na ang kon ano man nga indi ensakto nga ginahimo sini bangud mabudlay na ang panahon subong kag posible may matabo sa iya.

Sa iya paghangup, suno sa amay nga ang natabo sa iya bata ang kabayaran na sang iya mga nahimo sang mga nakaligad.

Samtang, suno naman sa live-in partner ni Richard nga si Memay, wala siya nakahibalo kon ano man ang mga aktibidad sang iya bana sa diin iya ginklaro nga wala naga-gamit sang druga si Richard apang wala siya nakahibalo kon bala ini ang naga-enggage sa illegal drugs.

[image: image.png]

Facebook Comments