BACOLOD CITY – Wala pa sang may nahambalan kon bala may extension ang COMELEC sa deadline para sa filing sang Statements of Contributions and Expenditures – SOCE para sa mga kandidatu sang nagligad nga May 14 Barangay kag Sangguniang Kabataan elections.
Ini ang ginpahayag ni Provincial Comelec Supervisor Atty. Jessie Suarez angut sa last day sang filing sini, subong nga adlaw.
Diri sa probinsya sang Negros Occidental, ang Comelec Provincial Office, Bacolod City kag mga Comelec Offices sa probinsya nagbukas kahapon bisan nga holiday agud nga ma-accommodate ang mga kandidatu nga magfile sang ila SOCE antes pa man sang deadline sini nga adlaw.
Dugang pa ni Suarez nga dapat magfile sang ila SOCE ang mga kandidatu sa talatapan sang Comelec tubtub sini na gid lamang nga adlaw.
Nahibaluan nga may kapin sa 23,548 tanan ka mga kandidatu nga nagpadalagan sa Barangay kag SK elections sa Negros Occidental sadtong Mayo 14.
Sa Bacolod Comelec kaina, naobserhan sang dyHB nga sa gihapon madamo ang naghingagaw sa pagfile sang ila nga SOCE sa diin kalabanan diri ang mga nagkalapierde nga mga kandidato.
Ang mga kandidatu nga mapaslawan sa pagfile sang ila SOCE ang may penalidad nga P1,000 tubtob P30,000 sa una nga offense samtang sa ikaduha naman nga offense ini sila ang magapangatubang sang kaso kag perpetual disqualification sa pag-uyat sang public office./dyHB BACOLOD
