Davao Occidental – Nangayo og dispensa ang Provincial Government sa Davao Occidental sa insidenteng pagkadaut sa nahatag nga ayuda partikular na sa mga residente sa munisipalidad sa Sta. Maria nga gipailawom sa hardlockdown tungod sa Coronavirus Disease 2019 (COVID-19).
Sa interbyu sa DXDC RMN Davao kang Carlos Casaysay, Davao Occidental Provincial Information Officer, gibutyag niini nga wala nabantayan nga nadaut na ang sulod sa mga kinarton nga ayuda sulod sa stock room ug kini nahatag sa maong mga residente.
“Abi nila’g okay pa ‘to kay naka-karton man gud ‘to siya, naka-box na siya daan ba. So, all items naka-box gyud, dili siya makita, dili siya kanang mura’g open. So, mao ‘to ang hinungdan, dili gyud mabantayan. Unya ang weather baya nato moulan ug muinit. Nag-isyu na man ‘mi og statement. Nangayo ‘mi og pasensya sa tanang mga nakadawat,” sulti ni Casaysay.
Gibutyag ni Casaysay, padayon karon ang pagsuta kung pila ang mga nakadawat sa maong daut nga ayuda aron kini mailisan o makambyoan diin mitabang usab ang Sta. Maria LGU niini.
Pahinumdum sa opisyal nga deritsong ipaabot sa LGU ang susamang mga concern o uban pang problema aron kini maaksyonan dayon, ug dili na ipaagi sa social media.
“Hangyo lang namo nga kadtong tanan nga nakadawat, kung naa may problema, open man ang atong linya. Kung naay mga other concerns, ipasa lang sila through right channeling para ma-ayos, matubag or properly ma-address ang mga problema nato,” segun niini.
RadyoMaN Kirby Manzon
