Daling gibalhin sa kapulisan ngadto sa Gingoog City Jail kagahapong adlawa ang magtiayong gituohang sakop sa New Peoples Army o NPA nga gisikop gamit ang warrant of arrest.
Matud ni Police Supt. Ariel Philip Pontillas, Acting Chief of Police sa Gingoog City Police Station nga tungod sa isyu sa seguridad wala na usab nila nganli ang duha ka mga dinakpan.
Ang magtiayong NPA nasikop sa kapulisan sa Gingoog City ug kasundalohan sa 58th Infantry Battalion, Philippine Army niadtong Miyerkules sa Barangay 20, Gingoog City.
Gibutyag ni Pontillas nga ang magtiayon nag-atubang sa kasong murder ug multiple murder human nalambigit sa harassment nga nahitabo niadtong Hulyo 11, 2015 sa Barangay Alagatan, Gingoog City nga gikamatay sa usa ka sundalo.
Nalambigit usab ang duha ka NPA sa harassment nga nahitabo sa Sitio Palo, Barangay Hindangon, Gingoog niadtong Hulyo 19, 2015 nga gikamatay sa tulo ka miyembro sa CAFGU.
