Kalibo, Aklan – Daywa ka mga sakay it barotong pangpangisda rong nalastrohan matapos nga eompok rong makina samtang nagapangisda sa kaeaeawran nga sakop it Sibuyan Sea kahapon it mga alas 3:00 rong hapon.
Suno kay Lalaine Pallada it MDRRMO Kalibo ag Team Leader ko nagbulig sa pag rescue nga ro mga biktima nakilaea kanday Felipe Abelardo Jr., sa hustong edad, ag nakaangkon it lastro sa itsura, alima ag daywa ka mga siki; Rodel Jimenez, 24-anyos nga nakaangkon man it lastro sa itsura ag waea nga alima, tanan ra sanda hay mga Antique ag presente nga naga istar sa Sitio Baybay, New Buswang, Kalibo.
Base sa pag imbestiga ni Pallada sa mga biktima nasayuran nga rayang si Abelardo tag matabo rong insidente hay sa may makina naga operate tag gulpi nga eompok ag imaw naapuruhan sa itsura samtang rayang si Jimenez hay sa ibabaw pero naabot gihapon it pag asak ko krudo sa itsura.
Pero rong tatlo nandang ka kaibahan hay nakadaeagan sa pihak nga punta ag uwa mat a malastrohi.
Matapos rong pag eopok gin abandona nanda ro andang baroto ag nag linangoy pa it may kapin sang oras bago man sanda makita it mga mangingisda nga mga taga Antique man ag sanda gin rescue.
Nasayuran ro nasambit nga insidente matapos nga ro mga nag rescue kanda hay ginpicturan sanda ag gin post sa facebook. Nakita raya it sangka gwardya ko munisipyo it Kalibo ag insigida nga ginpatuon ro MDRRMO Kalibo ag dayon nga nagcontact sa Cost Guard ag iba pang mga rescue groups.
Sa bulig man ko mga mangingisda nga nag rescue kung sa siin sanda nag karga ko mga biktima tapos ginsaylo dayon sa maisot man nga baroto para nga maka dungka ag madaea sanda sa hospital.
Gindungka sanda sa may Bougainvillea Beach, Pook, Kalibo kaina it mga alas 3:00 rong aga-aga.
Insigida sanda nga gindaea sa sangka pribadong hospital ag naka admit sa isolation ward.
Sa makaron hay nagakinahanean man it bulig ro nasambit nga mga mangingisda.
