Malaybalay-Gingoog City Bypass Road, dool na nga mahuman

55
Anaa na sa 84% ang progreso sa ginasementong Malaybalay-Gingoog City Bypass Road project sa Department of Public Works and Highways (DPWH)-Region X.

Kini nga proyekto magsumpay sa siyudad sa Malaybalay sa probinsya sa Bukidnon ug sa siyudad sa Gingoog sa probinsya sa Misamis Oriental.

Gisugdan ang pagtrabaho sa maong proyekto adtong tuig 2015 ug gakagahinan og partial releases sa pondo matag tuig nga mukabat na sa kinatibuk-ang Php 7,643,714,000.00 sugod 2015 hangtud 2022 ilawom sa General Appropriations Act. Gikatahong mukabat sa Php 8.1 Bilyones ang kinatibuk-ang kantidad sa maong proyekto.

Ang maong Bypass road muabot sa 125.42 kilometros ang katas-on nga magsilbing alternatibong rota taliwala sa duha ka siyudad nga dili na muagi pa sa Sayre Highway ug sa Butuan-Cagayan De Oro-Iligan City Road.

Magsubay ang maong dalan gikan sa 1st Legislative District sa Misamis Oriental pinaagi sa mga barangay sa Santiago, Bal-ason, Dalway, ug Hindangon sa Gingoog City padulong sa mga lugar sa 2nd Legislative District sa Misamis Oriental sama sa Sitio Kalhaan, sa lungsod sa Claveria, Barangay Bulunay, Sitio Ulayanon, Barangay Kalabugao ug Mintupad pagawas sa mga barangay sa ikaduhang distrito sa Bukidnon sa Can-ayan, Kibalabag, ug Manalog sa Malaybalay City.

Ginalantaw karon nga maghatag og dakong kausaban sa ekonomiya partikular na sa agrikultura ilabi na sa paghatud sa mga suporta sa programa sa gobyerno nga mao ang National Task Force to End Local Communist Armed Conflict (NTF-ELCAC) ang maong proyekto.

Facebook Comments