General Santos City— Apektado gyud ang ekonomiya sa dakbayan sa Gensan tungod sa covid-19. Tungod niini posibleng lakip maapektuhan ang bonus nga angay sa mga empleyado sa gobyerno.
Kini ang gibutyag ni Gensan City Mayor Ronnel Rivera. Sumala niya nga lakip sa mga naka-apekto sa pag-ubos sa koleksyon karon nga tuig mao ang mga hospital tungod nalimitahan ang pasyenteng gina-admit ug sagad gobyerno ang nagasagubang sa mga bayrunon sa pasyente. Dako usab ang nahimong epekto sa temporaryong pag-undang sa byahe sa mga bus ug van pagawas ug pasulod sa dakbayan sulod sa pipila ka bulan, ingon man ang pagsirado sa pipila ka mga negosyo gumikan sa covid.
Tungod niini gi-angkon sa Mayor nga dili pa gyud tanang empleyado sa lokal nga panggamhanan sa Gensan ang adunay siguradong madawat nga christmas bonus. Apan higayon matud pa nga adunay sobra o savings, ilahang paningkamutan nga mahatagan ug pahalipay ang tanang empleyado.
Sa karon, ang segurado lamang mao ang tag P12,000 nga Christmas bonus nga madawat para sa kapin 2000 ka mga job orders sa LGU. Gani gipatutukan na matud pa kini sa Mayor sa finance group sa LGU aron mapangitaan kung asa pwedeng makuhaan ug pondo ang para sa mga regular nga mga empleyado. (LVR)
