Mga ahensya sa Davao, nagkahiusa batok posibleng krisis sa petrolyo ug transportasyon

Davao City – Gipangunahan ni PCOL Mannan Caracas Muarip, Acting City Director sa Davao City Police Office (DCPO), ang usa ka inter-agency coordinating meeting aron hisgutan ang posibleng epekto sa nagpadayon nga tensiyon tali sa Estados Unidos ug Iran, ilabi na sa suplay sa petrolyo, transportasyon, ug kahimtang sa seguridad sa syudad.

Ang maong meeting gitambungan sa nagkadaiyang ahensya sa gobyerno ug lokal nga panggamhanan gikan sa City Mayor’s Office, Task Force Davao, Philippine Coast Guard, Department of Trade and Industry, City Transport and Traffic Management Office, ug Department of Energy.

Tumong sa panagtigum ang pagpalig-on sa koordinasyon tali sa mga ahensya, pag-assess sa posibleng risgo, ug pagplano sa mga lakang aron mapanalipdan ang suplay sa petrolyo, masiguro ang hapsay nga transportasyon, ug mapadayon ang kalinaw ug kahapsay sa Davao City.

Sumala ni PCOL Muarip, bisan pa man layo ang internasyonal nga tensiyon, posible gihapon kining makaapekto sa lokal nga bahin, ilabi na sa presyo sa petrolyo ug suplay sa enerhiya, nga mahimo usab makaapekto sa ekonomiya ug transportasyon.

RadyoMaN Kareen Beltran