Nakumpiska sa kapulisan sa El Salvador City ug Provincial Public Safety Company sa Misamis Oriental ang kinartong mga bala sa mga high powered firearms ug explosives gikan sa tulo ka tawong sakay sa van nga miagi sa checkpoint niadtong Lunes.
Sakay sa maong van ang driver nga si Jerry Balabat, 55 anyos, iyang asawa nga si Amalia Balabat, 53 anyos ug Serio Pangantihon, 32 anyos nga puros taga Polomolok, South Cotabato.
Lakip sa mga bala mao ang 150 fired cartridges sa 7.62mm, 164 sa caliber 50 fired cartridges, unom ka kahon sa 7.62mm live ammunition, 50 rounds sa caliber 60 live ammunition ug unom ka M-203 grenade launcher nga gikonsiderang explosives.
Matud sa driver nga si Jerry Balabat nga igo lamang silang gisugo sa usa ka sundalo nga nailang si Rey Villacampo nga ihatud ang mga kargamento gikan sa Marawi City paingon sa General Santos City.
Mag-atubang sa kasong illegal possession of ammunition and explosives ang tulo ka suspek samtang padayon ang imbestigasyon sa kapulisan sa kung kinsa gyud ang tag-iya sa mga bala ug konektado ba sa teroristang grupo ang mga nasikop.
By: RadyoMaN Annaliza Amontos-Reyes
