Gilayong nihimo sa inspeksyon ang mga personahe sa City Disaster Risk Reduction and Management Department, Office of Building Officials ug City Engineer’s Office sa Cagayan de Oro human gitay-og sa intensity 6 nga linog ang syudad kaganihang mga alas nuybe sa buntag.
Dunay pipila ka buildings ang nareport nga dunay liki busa gilayon nga gisusi.
Nanawagan usab si Mayor Oscar Moreno pinaagi sa dxCC-RMN ngadto sa mga structural engineers aron matabangan ang mga inspection team sa syudad sa pagsusi sa mga buildings.
Lima ka tawo usab ang gidala sa ospital human makuyapan sa dihang nasinate ang linog sa Ayala Mall.
Kini naglakip nilang Alana Chel Vincila, 24 anyos, kinsa gidala sa NMMC, Angel Tapang, 23 anyos, Norelyn Villarte, 36 anyos, Ermilyn Iqueen, 21 anyos, kinsa gidala sa Polymedic Velez ug Julie Maklay, 31 anyos.
Gisira una sa publiko ang Ayala Mall human sa linog.
Suspendido na usab ang klase sa elementarya ug high school sa mga pampublikong tunghaan sa Cagayan de Oro.
Samtang, mga alas 10:42 kaganihang buntag subling gitay-og sa linog ang syudad nga naa sa intensity 3.
