Padayon makaron nga naga inabo ro numero it mga fishing boat sa Brgy. Pook ag New Buswang suno sa incident report nga ging padaea it Agricultural Services Division sa LGU Kalibo.
Base sa report daya ngara nga mga fishing boat hay halin sa probinsya it Antique ag nag-usoy it mapahuwayan dahil sa mabaskog nga humbak sa baeod sa andang area rason nga indi sanda makabalik sa andang lugar.
Pero gina sugid nga pilang dominggo eon do nagtaliwan umpisa kat nagdungka raya sa mga lugar hay uwa gihapon sanda nag panaw ag kung sa siin naga padayon pagid sanda it inabo.
Gina hambae pa nga nagtuga raya it maabong problema nga haeos adlaw-adlaw may naga dugang ag suno pa sa report nga matsa uwa sanda it plano maghalin sa municipal waters.
Gina alegar man nga ro andang fishing activity it daya karon nga mga fishing boat sa huridikasyon it municipal waters it Kalibo hay nakikipag-kumpitisyon eon haeos sa mga fisher folks iya sa banwa ag kung sa siin gina-occupy eon haoes nanda ro fish landing site it mga local fisherman.
Samtang nasayuran nga may una nga 15 fishing boat nga nakita sa coastal waters ag base man sa Brgy. Council hay ro daya nga mga baroto hay nauna eon nga naimbestigahan ag ging pang buoe do mga profile it mga boat captain ag crew nga naka-rekord man sa Kalibo PNP.
Dahil kara naga pangayo sanda it bulig sa LGU Kalibo ag sa Bureau of Fisheries and Aquatic Resources-Aklan para masolusyan dayang problema.
