BACOLOD CITY – Patay ang isa ka trabahante sa Cambodia, Bredco Port, Barangay 2 matapos ini ang ginlampusan sang bato kag kahoy mga las 7 kagab-i.
Nakilala ang biktima kay Richard Gantalao, 50 anyos kag residente sang Barangay Carol-an, Kabankalan City.
Sa imbestigasyon sang Scene of the Crime Operatives (SOCO) nagaguwa nga nag-inom inom ang biktima kag duha sini ka mga kasimanwa nga mga suspek nga sanday Ontoy Rivera kag Ronilo Medez.
Sa pahayag sang witness nga ginahinago lang ang pangalan, nabatian nya pa nga nagbinaisay ang tatlo tubtob nga may natabo nga komosyon.
Pila ka minutos ang nakalipas, nakita nya na nga nagahamyangon na si Gantalao kag nagapaligo sang iya nga kaugalingon nga dugo.
Patal nga pilas sa ulo ang naagom sang biktima lakip man mga lagob sa iya nga lawas tuga sang lampos.
Narecover sa crime scene ang duha ka dalagko nga bato nga amu naman ang ginlampos kay Gantalao lakip man ang duha ka dos por dos nga kahoy.
Nagpalagyo naman ang duha ka mga suspek matapos nga ila ginpatay ang biktima.
