HINOBAAN- Lapnagon ang pagkalamatay sang mga manok ilabi na sa Barangay Alim, humalin sang Marso sini nga tuig tubtob sining bulan sang Hunyo.
Suno kay Raffy Indino sang Purok 3 nga mga 100 fighting cocks ukon inugbulang nga manok nila ang nagkalamatay sa ila farm wala labot sini ang mga munga kag piso nga hinuptanan halin pa sang bulan sang Marso kag Abril sini nga tuig.
Suno sa iya nagalaway ang mga manok kag sa sulod sang tatlo ka adlaw mapatay ini bisan pa dapatan sang ila naandan nga bulong.
Suno kay Isaias Tabuada pumuloyo sang Purok 1 sang amu man nga barangay, mga 40 ka mga sulog kag munga ang nagkalamatay na sa ila.
Napatay man ang mga manok sang ila mga kaingod sini lang nga mga inadlaw sa amo man gihapon nga balatian.
Komon nga nagakatabo amo nga galaway ang manok, wala gana magtuka, nagauklo ang liog kag gapanglagom.
Si Larry Padilla sg Purok 5, mga 29 man ka fighting cocks niya ang napatay sini nga inadlaw subong man ang tanan nga munga kg piso nga hinuptanan sini.
Basi sa pahayag ni Erie Tembrevilla , residente sang Purok 4, mga 40 piso nga dalagku na ang napatay sini nga semana.
Suno sa pahayag sining mga biktima, wala nila mapadangat ini nga hitabo sa Municipal Veterinary Office kag bisan pa sa barangay.
Ginamatu matuan lang nila nga dapatan sang bulong ang nagamasakit nila nga mga manok base sa ila naandan nga pagbulong.
Nakit-an ang pila ka mga manok nga nagalutaw sa suba nga ginpanghaboy sang mga caretakers.
Gilayon naman nga gin-inform sang dyHB paagi kay Kasamang Vic Torrenueva ang Rural Health midwife sa amu nga hitabo para matagaan sang gilayon nga atensyon.
