Davao City – Patay ang duha ka lalake ug samtang usa ang samdan sa nahitabong pagpamanhig sa tulo ka armado sa birthday party sa syudad sa Isulan, Sultan Kudarat kagabii.
Giila ang mga namatay nga mao sila Francis Nono, 23 anyos ug Chester Paniaga, 26 anyos nga nagpuyo sa EJC Montilla, Tacurong City, Sultan Kudarat kinsa pulos natadtad og bala ang ilang mga lawas.
Samtang anaa sa kritikal nga kahimtang sulod sa Southern Philippines Medical Center si Leo Buac, 20 anyos tungod sa nahiagomang samad pinusilan sa kalawasan.
Matud ni Isulan Municipal Police Station Chief Police Superintendent Junny Buenacosa nga ang tulo pareho mitambong sa adlaw sa natawhan sa ilang kaila sa Barangay Kalawag sa mao nga lungsod.
Dihang adunay kalit mihunong nga motor sakay ang tulo ka armado ug gipaulanan dayon sila og bala atol sa kasagsagan kasadya sa adlaw natawhan.
Giingong patay diha-diha dayon sila Nono ug Paniaga ug wala na madala pa sa ospital samtang si Buac gilayon gisapupo paingon sa balay tambalanan.
Subay ani, blangko pa ang kapulisan sa motibo ug pagkatawo sa mga suspetsado busa gipalawman na karon sa mga imbestigador ang ilang imbestigasyon labot sa nasangpit nga krimen.
RadyoMaN Joel Viray
