Roxas City, Capiz – Isa ka motorsiklo ang gindala kag iga-validate sang Highway Patrol Group matapos ini ang marekober sa ginpatigayon nga inspeksyon kahapon sang aga sa isa ka shop nga nahamtang sa Plaridel Street Roxas City.
Suno kay Lt Col Ricardo Jomuad Jr., wala sang serial number ang chasis sang amu nga motorsiklo kabangdanan nga ginpakamaayo anay nga i-impound sang Higway Patrol Group agud nga mapatigayon ang berepikasyon.
Kaupod ang mga personnel sang Business Permit and Licensing Office ukon BPLO, ginbisitahan sang mga ini ang mga shops nga nahamtang sa Brgy Lawaan Bolo kag Lanot Roxas City agud nga inspeksyunon kun may yara sang mga ginpang-dispose nga mga kinahawatan nga mga motorsiklo.
Samtang nahibaluan sang grupo nga may yara naman ang mga ini sang business permit apang expired lamang.
Ginhatagan naman sang BPLO sang lima ka adlaw nga plaso ang amu nga mga tag-iya sang shops nga i-proseso ang tagsa nila ka mga permit.
