GIPANGHIMAKAK sa City Agriculture Office ang mikuyanap nga taho sa social media nga dili matud pa maayong kaunon ang mga isda nga gibaligya sa kamerkadohan gumikan kay nagdala kini og Human Immunodeficiency Virus (HIV).
Subay sa mikuyanap nga taho nga adunay matud pay mga tawo nga nangamatay human nakakaon sa mga isda nga nakakaon usab og tube sa mga pasynte sa HIV nga gipanglabay sa dagat.
Gibutyag ni City Agriculturist Octavios Molo nga walay kamatuoran ang maong mga taho ug nagpabiling luwas kaunon sa katawhan ang mga isda nga gipangbaligya karon sa kamerkaduhan ilabi na dinhi sa dakbayan sa Iligan.
Matud ni Molo nga mismong ang Bureau of Fisheries and Aquatic Resources o (BFAR) Region 10 ang mipaklaro nga luwas kaunon ang mga isda bisan paman kon pananglit adunay mga tube sa pasyente sa HIV nga gilabay sa dagat.
