New Washington, Aklan — Uwa eon it kabuhi tag makit-an nga naka bigti kaina it aga-aga rong sangka mister sa Sitio Centro, Brgy. Dumaguit, New Washington, Aklan.
Ro biktima nakilaea kay alyas “Jan-Jan”, 31-anyos ag residente it nasambit nga lugar.
Base na naka kita nga tiyo it biktima nga kaina it aga-aga hay anang gintawag ro biktima pero uwa raya nagasabat rason anang ginling-ling sa gabot ag nakita na ro biktima nga may higot sa li-og ag ro posisyon hay medyo naga pungko.
Insigida imaw nagtawag sa andang mga kapamilya ag ada nga gintan-aw ag idto nakumperma nga nagbigti rong biktima.
Samtang, sa pakikipag-angot man it RMN News Team kay PMSGT. Valencia it New Washington PNP nga pagkabaton nanda it report hay nag responde sanda sa area ag pag-abot hay anda man nakita ro biktima nga may higot sa li-og nga cable wire ag nakahigot sa baeayan it andang baeay.
Insigida sanda nagtawag it SOCO para nga mausisa rong crime scene ag basi man sa adang pag-usisa hay uwa sanda it may nakita nga patimaan nga may foul play pero gina encourage nanda rong pamilya nga ipa idaeom sa autopsy rong bangkay para masyan gid ro ginkamatay it biktima ag maduea man ro duda it pamilya.
Base sa insyal nga pag imbestiga it mga kapulisan nga rayang biktima kahapon hay naga inunum ag kabii pag-uli na sa andang baeay hay uwa ro anang live-in partner na si Jonalyn kamana man ro andang unga nga 3 mos. old. Dikara rayon nagwala rong biktima pero ko ulihi hay nahapatawhay man imaw it anang pamilya ag uwa gina eaumi nga raya hay magbigti.
Nasayuran man nga ro anang live-in partner hay nag-uli kahapon sa Cawayan daea ro andang unga bangud nga basi sa pahayag ni Jonalyn nahadlok imaw sa pamilya it biktima ag permi nga nagahinilong ro biktima.
Suno man sa pamilya it biktima hay ro babaye man ro may deperensya ag may problema sa andang pagpangabuhi.
Kahapon hay nag-eaong ag nag-uli rayang si Jonalyn sa Cayawan nga uwa ngani imaw pagsugti it biktima pero nagpilit raya ag raya man ro ginapanan-aw nga rason kon ham-an nagbigti ro biktima.
Nasayuran pa gid sa pamilya it biktima nga rayang biktima hay makatlong beses man eon naghana nga magpakamatay ag permi nagahinambit nga magapakamatay ag kaina hay natuman raya.
#TatakRMN
