Davao City – ‘Mooring lines’ nga nalambud sa propeller maoy gitudlong hinungdan sa pagkalunod sa usa ka motorlaunch vessel nga paingon unta kini sa usaka island-hopping trip sa Samal kagahapon.
Subay sa inisyal nga imbestigasyon sa kapolisan Sta Ana PNP, ang maong pisi nalambud sa propeller samtang ni-backing kini niadtong tungora, hinungdan sa pagkabuslot sa kasko ug inanay kining naunlod.
Aduna kiniy sakay nga 45 ka mga pasahero ug upat ka crew members diin ang insidente nahitabo alas 8:10 sa buntag sa Sta Ana Wharf.
Sa report gikan Sta Ana PNP, gibutyag sa kapitan sa lantsa nga si Torencio Pombo nga samtang mo-navigar na sila padulong sa Talikud Island para mag island hopping, nahitabo ang insidente.
Gipaklaro sa PNP Maritime Unit nga usa ang angol nailang si Jalyssa Revilla kauban sa 45 ka pasahero human narescue sa mga sakop sa Philippine Coast Guard,Regional Maritime Unitug Central 911.
Nahinabi usab sa DXDC RMN Davao ang usa ka pasahero kinsa nagkanayon nga tumang kahadlok ang gibati niya samtang nagsakay pa siya niadtong tungora apan daku ang iyang pagpasalamat sa Ginoo nga gitagaan pa siya ug ikaduhang kinabuhi human kini na-rescue.
RadyoMan Don Pulayao
