Kalibo, Aklan— Gindakop it PNP Highway Patrol Group ag Land Transportation Office ukon LTO si Freddie San Miguel 34 anyos it Brgy. Tigayon Kalibo matapos maaktuhan nga ga drive it motor nga hilong.
Natabo ro pag apprehend sa suspek kainang udtruadlaw sa highway nga sakop it Brgy. Estancia.
Sakay si San Miguel it anang motorsiklo nga owa it helmet ag napan-uhan nga bukon it deretso ro pagpadaeagan.
Insigida raya nga ginparahan it mga otoridad kung sa siin ginpaidaeaum raya sa testing gamit ro Breath Analyzer Machine.
Suno kay Mr. Marlon Velez LTO Aklan Chief nga ro allowable level eamang it alcohol sa eawas hay 0.05 percent apang ro suspek hay nakaangkon it 1.83 percent.
Ginpaidaeum man ro nasambit nga motorista sa 1 leg stand ag eye test apang owa raya naka pasa.
Base sa pagimbestiga sa suspek nga nag-inom raya kabie ag kainang agahon.
Makabig suno kana nga delikado ro gin-himo it suspek sa anang kaugalingon ag eakip eon sa mga motorista bangud posible raya nga maaksidente ag maabu pa ro mahalitan.
Sa makaron presenteng nakakulong sa lock up cell ro suspek ag nakataeana nga pagapasakaan it kasong pag eabag sa RA 10586 ukon Anti-drunk and drugged driving act of 2013.
